Dinsdag, 26 Mei 2015

OUMA SE VLEISPASTEI ROLLETJIES

LES
1. Alle deeg moet so koud as moontlik voorberei word sodat die botter nie kan smelt nie.  As die deeg te warm word dan gaan die olie uitbak en die deeg taai en olierig wees.   Dus hou alle bestanddele so koud as moontlik.

2. Om die botter makliker in die koekmeel in te vryf rasper die koue botter by die koekmeel in, dit maak die invryf tyd aansienlik korter.


3. Moenie die eierwitte weg gooi nie. 
Ek gebruik dit om skuimpies mee te maak, sien die resep in files oor meringues.

4. Gedurende die rustyd van die deeg in die yskas deel ek die deeg in 4 dele en plaas dit in A4 grootte sakkies en rol dit in die sakkie mooi plat, dit maak die uitrol later net baie makliker. 
Soms gebruik ek nie al die deeg nie en vries dit dan net so.

5. Vorm jou maalvleis vooraf deur dit op kleefplastiek in lang rytjies te skep en dan op te rol in worsies. Laat dit in die vrieskas styf word voordat jy dit gebruik, moenie vries nie. Die rol moet ongeveer 4 - 5 cm in deursnit wees.

6. GOM EN GLANSLAAG
1 eiergeel gemeng met 100 ml melk.

DEEG
8 kop koekmeel
5 ml sout
500 g botter - Rama of Stork bake - koud en gerasper
4 eiergele
4 el asyn
2 kop yswater

METODE
1. Vryf die botter in die meel en sout mengsel, totdat dit soos broodkrummels lyk.

2. Voeg die eier, asyn en water saam en klits goed deur.

3. Meng al die eiermengsel met die meelmengsel. 
Druk liggies aanmekaar en knie liggies. Plaas in yskas om te rus terwyl die maalvleis gemaak word.

MAALVLEIS VULSEL
1 kg maer maalvleis
500 g kapok aartappels
1 tl knoffel
sout en peper na smaak

METODE
1. Maak die maalvleis goed gaar met die knoffel in. Voeg die kapok aartappels by en meng deeglik deur.

2. Laat die maalvleis afkoel voordat dit gebruik word in die deeg, onthou al die bestanddele moet koud bly.

3. Vorm die maalvleis rolletjies en plaas in vrieskas om te set.

MAAK VAN PASTEIE
1. Rol die deeg ongeveer 3 mm dik uit in ‘n reghoek. Strooi die oppervlak waarop jy rol goed met koekmeel.

2. Plaas die worsie op die deeg en smeer die randjies met melk en eiergeel mengsel, dit is jou gom en ook jou glanslaag, rol toe en druk vas.

3. Net voordat jy die worsrolletjies bak, smeer met eiergeel mengsel en sprinkel sesamesaad, papawersaad, paprika of kaas bo oor, jou keuse.

4. Hierdie worsrolle kan dan bevries word of gebak word.

5. Bak by 180 ˚C vir 20 - 25 minute.

BRON: Hantie Bezuidenhout se resep.

LES: Annelien Pienaar, www.bosenbergguestfarm.co.za










Saterdag, 23 Mei 2015

ROOSMARYN LAMSKENKEL EENSKOTTEL GEREG


Ons het groot geword met skaapvleis.
Elke winter het my ouers 6 skape, 2 varke, 2 beeste en 50 hoenders geslag, dit was omtrent ‘n slag der slagting!
My tannie hulle het saam met ons die vleis gedeel en ons kinders het maar so om die slagtery en verwerking rond gespeel.
Ons het so 2 weke lank die vleis verwerk omdat die skaap en die bees moes hang om ryp te word.
Ek onthou hoe my oom die skape in die donker stoor toegemaak het sodat hulle ontspanne was voor die slag proses, hulle het nog steeds toegang tot kos en water gehad.
Laat ek vir julle vertel, ek het tot op hede nog nie weer sulke sagte skaap geproe soos daardie van my kleintyd nie.
Ons was dan bederf met ‘n skenkel potjie wat my pa gemaak het, vandag nog is hy die Potjie koning in Skeerpoort, sy potte is legendaries!
Hier is my weergawe van my pa se potjie maar in die hutspot (slow cooker).


RESEP
1 kg lamskenkels of kombinasie van nek en skenkel
1 ui -  so groot soos vuis
3 groot wortels - in dik wiele gesny
2 seldery stingels - sny in klein wieletjies
5 ml sout
5 ml roosmaryn, gedroog
5 ml tiemie
5 ml swart peper - grof gemaal
125 g botter
500 g baba aartappels - afgespoel
250 g sampioene
100 g ertjies
250 ml gedroogde appelkose
250 ml gedroogde pruimedante
250 ml appelkoos sap
60 ml bisto poeier - aangemaak in appelkoos sap

METODE
1. Voorverhit swaarboom pan en gooi die botter in.
Braai die vleis tot bruin en die vleissappe alles ingeseël is, verwyder uit pan en sit solank in hutspot.

2.  Braai die uie en die seldery in die sous van die vleis tot glansend en deurskynend.
Sprinkel oor die vleis in die hutspot.

3. Plaas al die groente en vrugte in die hutspot met 1 kop water en bedek.
Laat prut op hoog vir 6 - 8 ure of totdat die vleis van die been los kom.

4. Maak die bisto aan met die appelkoos sap en voeg by die vleis.
Laat vir 10 minute deur kook en bedien warm met stampmielies.

PORSIES: 4 - 6.

BRON: Gert Bezuidenhout.

Woensdag, 20 Mei 2015

SOETSUUR VARK EN PASTA GEREG

Hierdie wonderlike en vinnige dis kan met enige vleis gemaak word.
Die gereg het sy oorsprong van die Lo mein disse.
Ek gebuik graag gesonde olies soos klapper, druiwepit of olyfolie.
Die groente wat gebruik word is vars groente en heilsaam en gesond vir die hele gesin.

LES
Wanneer vleis in 'n pan gebraai word, maak eers die pan warm en voeg laaste die olie by.
Die kanse dat die olie kan oorverhit is baie goed en dit is ook nie gesond omdat die rook wat jy sien, akroloien is, wat karsinogenes (kankervormende) dele bevat.


RESEP
500 g vark repies vleis - geen vet OF hoender OF volstruis
500 g spaghetti
2 el kookolie OF klapperolie OF druiwepitolie
1 el knoffel - fyn gekap
1 tl vars gemmer - fyn gerasper
2 wortels - in julienne repies
500 g sampioene - skyfies gesny - vee net af, moenie in water spoel nie ander trek dit water
2 soetrissies - baie dun gesny, -verskillende kleure lyk mooi
1 tl sout
400 g boontjiespruite
4el sprietuie - fyn gekap

MARINADE
2 el soya sous - anders sal woestersous ook reg wees
1 el olie van jou keuse
2 el heuning
2 el bruinsuiker
2 el suurlemoensap
sout en peper na smaak

METODE
1. Meng al die bestanddele van die marinade saam en marineer die vleis daarin vir 1 uur.

2. Kook die pasta tot al dente, sag maar ferm as jy dit byt, in ligte gesoute water met bietjie olie by.

3. Indien jy ‘n wok het, haal hom uit en laat waai!

4. Maak die pan eers goed warm.
Sit dan eers 2 el olie by en braai die vark tot gaar.
Haal van die hitte af.
Was pan.

5. Verhit die wok weer en voeg 2 el olie by.
Braai die knoffel en gemmer totdat die geure ontwikkel.
Voeg die wortel by en braai vir 2 minute.
Dan volg die sampioene vir 2 minute en dan die soetrissie.

6. Meng dan die vleis by die groente in en laaste die pasta.

7. Verwyder van die hitte en roer die boontjiespruite en sprietuie by,
Bedien warm

PORSIES: 4 - 6 mense.

BRON: Annelien Pienaar - Bos en Berg gasteplaas.

Maandag, 18 Mei 2015

AÏOLI SOUS

Hierdie heerlike sous word soos mayonnaise gemaak.


RESEP
1 ekstra groot eiergeel - by kamer temperatuur
2 knoffel toontjies - fyn gemaak
5 el ekstra virgin olyfolie
5 el sonneblom olie
2 el suurlemoensap of witasyn

METODE
1. Klits die eiergele tot lig en donsig.

2. Klits dan die knoffel en sout by, proe aan die sout en peper.

3. Klits nou die olie een eetlepel suur en een eetlepel olie op ‘n keer by, klits baie lank en deeglik vir die olie om in suspensie te bly (die olie moenie weer kan skei nie).

4. Bedek en hou eenkant.

VARIASIE
1. Voeg by die klaar voorbereide sous 1 el Dijon mosterd, glad of heel korrels, 1 el witsuiker en gerasperde peper wortel.

2. Bedien as doopsous, mayonnaise vir ander geregte soos aartappel slaai, gebakte geregte soos vis, en gebraaide groente..

PORSIES: 4 persone.

BRON: Annelien Pienaar, Food and Clothing technology, 1999.


VISBALLETJIES MET AÏOLI SOUS

Dit klink nou na ‘n vreeslike imponerende gereg, maar raai wat?
Dit is visballetjies bedien met ‘n spesiale mayonnaise.
Om die Aïoli te maak is regtig baie maklik, dit is geurig en ryk en bring die smaak van die 
vis uit.
Die balletjies kan in oormaat gemaak word en dan bevries word. 
Laat by kamertemperatuur ontdooi en bak soos gewoonlik. 
Ek het altyd in voorraad.

RESEP
700 g aartappels - geskil en in blokkies gesny
700 g haddock of stokvis of tuna
1 eiergeel - liggies geklits
2 knoffeltoontjies
2 e pietersielie - vars gekap
2 e vars dill tippies - gekap
½ tl neutmuskaat
sout en peper na smaak
suurlemoen wiggies

METODE
1. Kook die aartappel blokkies in liggies gesoute water tot gaar.Dreineer die water.

2. Terwyl die aartappels afkoel, posjeer die vis in melk vir 5 - 8 minute tot gaar, die vis moet ferm
en wit wees.Haal uit die melk en vlok met ‘n vurk.


3. Maak die aartappel fyn en voeg die eier en knoffel by terwyl jy dit doen.

4. Roer dan die kruie en sout by.Meng die growwe stukkies vis by.

5. Sit koekmeel aan jou hande om die balletjies te vorm, dit voorkom dat die balletjies vas sit aan
jou hande en gee ook ‘n mooi bruik krakerige tekstuur aan die balletjies as dit diepvet gebraai word.

6. Verhit olie in diep kastrol tot 180 ˚ C of totdat ‘n broodblokkie wat in gegooi word in die warm olie binne 30 sekondes verbruin.
Diepvet braai die balletjies in hopies van 5 op ‘n slag.

7. Onthou as jy te veel balletjies in die olie sit, die olie se temperatuur drasties gaan val en die balletjies dan olierig gaan wees...

8. Plaas op dreinerings papier en sit dadelik in voorverhitte oond om die krakerige tekstuur te behou.

AÏOLI SOUS
1 ekstragroot eiergeel - by kamer temperatuur
2 knoffel toontjies - fyn gemaak
5 e ekstra virgin olyfolie
5 e sonneblom olie
2 e suurlemoensap of witasyn

METODE
1. Klop die eiergele tot lig en donsig.

2. Klop dan die knoffel en sout by...proe aan die sout en peper

3. Klop nou die olie een eetlepel suur en een eetlepel olie op ‘n keer by...klits baie lank en deeglik vir die olie om in suspensie te bly (die olie moenie weer kan skei nie).

4. Bedek en hou eenkant.

VARIASIE
1. Druk die balletjies plat om 'n viskoekie te maak.

PORSIES: 4 persone.

BRON: Annelien Pienaar, Food and Clothing technology, 1999.

ROSTI OMELET (AARTAPPELKOEKIE OMELET)

Hierdie aartappel omelet is wonderlik om vir vegetariër gaste voor te sit.
Ek bedien dit as ontbyt, ligte middagete en ook as bykos met hoofetes.
Jy kan proteine byvoeg of weg neem, vis, hoender, spek, gerookte salm, worsies en vele meer. Bedien met ‘n songedroogde tamatie pesto of soetrissie sous.

RESEP
250 g rou aartappel - gerasper of in baie dun skyfies van 3 mm gesny
1 middelslag ui - gerasper
2 knoffeltoontjies - fyn gedruk
1 wortel - gerasper
2 e olyfolie
1 soetrissie - kleur van jou keuse - julienne snitte
1 murgpampoentjie - gerasper met skil
2 groot eiers
3 eierwitte
2 el spriet uie - gekap
½  kop mature cheddarkaas -  gerasper
rocket blare vir garnering

METODE
1. Plaas die gerasperde aartappel in koue water vir 10 minute vir die ekstra stysel om af te kom en om te help dat die aartappel sy vorm behou as dit gesny word.
Dreineer die water, en druk droog met kombuispapier.

2. Meng die uie, knoffel en wortel by die aartappel.

3. In ‘n voorverhitte kleefvrye pan, braai die bogenoemde  mengsel vir 5 minute by medium hitte.

4. Voeg die res van die soetrissie en murgpampoentjie by en bedek met deksel en roer so 2 keer in 5 minute.

5. Klop die kaas, heel eiers, eierwitte, sprietuie, sout en peper en gooi oor die aartappel mengsel.
Roer liggies sodat alles kan deur werk en laat met deksel op by lae hitte gaar word en set vir ongeveer 5 minute.

VARIASIE
1. By stap 5 kan enige ander protein bygevoeg word.

Porsies: 4.

BRON: Annelien Pienaar, Bos en Berg guestfarm, 2006.


RYK DEMI-GLAZE SOUS VIR KWALITEIT VLEIS SNITTE

Demi-glaze word gebuik by baie duur, sagte vleis snitte om geur by te sit. Dit is eintlik 'n bruinsous wat 2 dae neem om te maak. Propvol geur en effense alkohol geurtjie, die moeite werd om te maak, daarom dat dit duur is.

ESPAGNOLE SOUS AS BASIS VIR DEMI-GLAZE 
45 ml Olie
60 g Gerookte ham - fyn opgekap
½ Ui - opgekap
½ Wortel - opgekap
30 g Koekmeel
1 liter Bruin "veal" (kalfsvleis) aftreksel, ek kook maar self my aftreksels, koop dit nooit.
1 Tamatie - in kwarte
2 e Tamatie puree
Sout en peper
Bouquet garni

METODE
1. Verhit olie en voeg spek by en braai tot bruin. Voeg dan die ui en wortel by en braai tot sag.

2. Voeg die koekmeel by en kook stadig om 'n ryk bruin roux te vorm, dit neem so 5 minute.
Verwyder van hitte

3. Bring die aftreksel tot kookpunt en voeg so 'n ⅓de van die aftreksel by die roux en meng met whisk goed. Laat kook om te verdik.

4. Voeg dan die aftreksel by en kook weer. Voeg die res van die bestanddele by, die sous met vir 3 - 4 ure matig vinnig kook totdat dit met die helfte gereduseer is. Halfpad deur, gooi laaste van aftreksel by en skep die heeltyd die skuim af om die sous te verhelder.

5. Filtreer sous, moenie dit deur forseer anders maak jy die sous wolkerig en dit verloor sy glans.

VIR DEMI-GLAZE MOET JY DIE VOLGENDE BYVOEG BY DIE BASIS SOUS VAN ESPAGNOLE 


250 ml Espagnole sous
2 e Fyn gekapte sampioene
1 e Tamatie puree
2 en Bruin veal aftreksel
2 e Madeira wyn
15 g Vleis glansuursel (wanneer jy veal aftreksel kook totdat dit 'n taai besigheid word, dit kan vir maande gevries word, uiters gekonsentreerd
15 g Botter

METODE
1. Kook alles saam behalwe die vleis glansuursel en botter. Die vloeistof moet weer 250 ml word, so 30 minute se kook. Dreineer en voeg dan by die vloeistof die glansuursel en botter, klop tot glasig.

BRON: Annelien Pienaar, Bos en Berg gasteplaas, 2011.

Vrydag, 15 Mei 2015

AARTAPPEL POFFERTJIES (POMME DAUPHINE)

Hierdie aartappel poffertjies is so oud soos die berge en mense vergeet soms van hulle.
Die basis is Kapok aartappels en Choux deeg (poffertjie deeg) wat gekombineer word.
Die balletjies kan gevul word met spek, kaas en groente.
Dit kan as vingerkos of bygereg bedien word.
Die worsies is heerlik om soos ‘n skyfie in sousies te doop.
Geniet!
RESEP
150 g koekmeel
110 g botter
knippie sout
150 ml melk
150 ml water
4 medium eiers - geklits
1 kg kapok aartappels - klaar gegeur
2.5 ml neutmuskaat

METODE 
1. Sif die koekmeel en sout saam.

2. Verhit die botter, melk en water tot kookpunt.

3. Voeg die koekmeel by die kokende water, verwyder die kastrol van die hitte.
Roer die inhoud baie vinnig totdat dit los kom van die kante van die kastrol en ‘n bal vorm.

4. Laat die mengsel afkoel totdat dit koud genoeg is om die eiers een vir een by te klop met ‘n houtlepel.
Hierdie is nogal moeilik, die deeg wil aanvanklik nie met die eier meng nie maar hou aan roer, houtlepel se kind werk nogal goed vir die werkie.
Elke eier moet so ingewerk word, nie alles op eenslag nie.
As die mengsel te warm is gaan die eiers gaarword!

5. Die kapok aartappels moet geen vog inkry nie.
Kook die aartappel in sy skil tot gaar, moenie dit vooraf skil nie want dan het ons te veel vog in die deeg later en die bolletjies of worsies wat gespuit word gaan dan oop bars!
Druk letterlik net die aartappel fyn, dit is al, sout, peper en neut muskaat.

6. Meng die aartappel goed deur met die Choux mengsel.

7. Vul ‘n spuitsak met die mengsel,
Hier kan jy nou lekker speel.
Jy kan ‘n ster neus vat, die grootste gat wat jy het 48 en groter en spuit dan die mengsel in warm olie, sny elke repie af sodat almal regte lengte is.

8. As jy die balletjies wil maak spuit dan R5 grootte bolletjies met stomp neus punt en rol dit dan in bolletjies.
Diepvet braai.

VARIASIE
1. Jy kan spek, kaas (mozzarella, feta, haloumi) in die balletjies sit en bak.

2. Die balletjies kan ook in eier en broodkrummels gedoop word vir ‘n krakerige bruin voorkoms.

BEDIENING
As bykos by hoofgereg, vingerhappies op ‘n stokkie met heerlike doopsouse.
Kosblik happies vir die kleingoed...

BRON: Annelien Pienaar, Bos en Berg gasteplaas, 2006.

Woensdag, 13 Mei 2015

TUISGEMAAKTE MALVALEKKERS

Hierdie twee resepte wat ek met julle deel is al vir paar generasies deel van ons gesin.
Die eerste resep het nie eier witte in nie, dus vir mense met eier allergieë is dit heerlik lig en sponsig!

Die tweede een is die oudste van die 2 resepte en bevat wel eierwitte.

Hoop julle gaan berge van hierdie soet en sagte soentjies maak.

LES
1. Wanneer mens malvalekkers maak dan het dit baie dieselfde beginsel as met nougat maak.
Jy het ‘n suiker termometer nodig om regtig akkuraat te werk. 
En jy gaan klits dat dit my jou ore uitloop.
‘n Elektriese menger is van kardinale belang, jy gaan nie met die hand soveel lug in kan werk nie.

2. SPONS
Wanneer gelatien oor koue water gesprinkel word sodat dit kan hidreer, water kan absorbeer en dit maklik kan oplos wanneer dit verhit word.

3. SMELT VAN GELATIEN
Nooit in die mikrogolf oond nie.
Ek sit net die bakkie waarin ek die gelatien gespons het in ‘n ander houertjie met kookwater om die gelatien te help smelt.
Roer om op te los.
Vervang die water weer totdat al die gelatien gesmelt is en die mengsel soos dik stroop is.

4. Sodra die mengsel gereed is om in die pan geskep te word om te stol moet jy baie vinnig werk, die mengsel gaan stol, jy kan nie wag nie.
Maak dus seker dat al jou panne en bestanddele gereed is.

5. WAT IS DIE VERSKIL TUSSEN GLUKOSE STROOP EN MIELIESTROOP?
Glukose bevat 15 - 19% water en is ‘n inverte suiker.
Dit word gemaak in ‘n verskeidenheid konsentrasies, vir bak doeleindes is die konsentrasie dikker as mieliestroop.

Mieliestroop bevat 24% water en is gemaak van glukose en bygevoegde fruktose om kristallisering te voorkom.

Dus is die verskil net die vog inhoud wat verskil, maar eintlik dieselfde!
As jy versigtig is en die kokende suiker mooi oppas, kan gewone goue stroop gebruik word maar dan moet jy besef dat dit maklik kan brand en ‘n bitter nasmaak kan kry.

MALVALEKKER STOF
½ kop mielieblom (maizena)
½ kop versiersuiker

Sif alles 3 keer saam.
Hierdie stof word gebruik om te verhoed dat die malvalekker vas sit.

RESEP 1
2½ el gelatien
½ kop water om gelatien in te spons
½ kop water
⅓ kop glukose stroop
2 kop wit suiker
¼ tl sout
2 tl geursel -  rooswater / mint / vanielje / karamel / amandel
½ tl gel kleursel

1. Spons die gelatien in die water.

2. Plaas die suiker in ‘n hopie in die middel van die kastrol, ’n piramide!!!

3. Voeg die water by rondom die suiker om ‘n dammetjie te maak.
Draai die kastol in ‘n sirkel om die water en die suiker te meng, geen lepel in die suiker nie en geen roer!
Draai die kastrol net in die rondte.

4. Voeg dan ook die glukose by.
Was die kante van die kastrol af as daar suiker kristalle vas sit.
Doen dit deur ‘n kwassie in water te doop en dan die kristalle af te was.

5. Kook die stroop tot dit 115 ˚ C bereik of sagtebal stadium.

6. Smelt die gelatien voordat die stroop by 115 ˚ C kom.

7. Plaas die gelatien in ‘n mengbak, voeg die stroop by sodra dit op die regte temperatuur kom.

8. Klop die warm mengsel eers op stadig, jy kan hier lekker brand, die sous kan spat.

9. Sodra die mengsel skuimerig word verhoog die spoed en klits vir 10 - 12minute tot lig en donsig.

10. Voeg die kleursel en geursel by, klits die heeltyd soos jy byvoeg.

11. Skep die mengsel in ‘n voorbereide pan uitgevoer met waspapier wat gespuit is en dan met ‘n diklaag mielieblom mengsel gepoeier is.
Die bakpapier moet oor die kante van die pan gaan.

12. Maak gebruik van 2 panne wat dieselfde grootte is, die rede is, die een pan word bo op die ander pan geplaas met ‘n liter water as gewig om die mengsel mooi plat te maak.
Sprinkel ook die bokant van die malvalekker deeg met die mielieblom mengsel en sit weer gespuite bakpapier op voordat die pan met gewig op gesit word.
Onthou, doen ook so met nougat maak.

13. Los vir 3 - 4 ure om te stol, nie in die yskas nie!
Jy kan blokkies sny, vormpies druk, afval stukkies kan vir miljoenêrs tert gebêre word.
Elke gesnyde deel moet weer in die mielieblom mengsel gaan om die taaiheid weg te kry.
Die sny toerusting wat gebruik word kan met kleefwerende sproei gespuit word sodat die taai degie nie vas sit nie.

RESEP 2
2 el gelatien
¼ kop kraanwater  om gelatien in te spons
¾ kop kookwater
2 kop witsuiker
3 el goue stroop
2 eierwitte
1 tl vanielje geursel

1. Volg die stappe van nommer 1 - 10 van resep 1.

2. Klop dan apart terwyl die mengsel nog besig is, die eierwitte styf.
Vou dit dan in by die mengsel, werk hier baie vinnig en skep in pan.
Volg dan weer die res van die stappe in resep no.1

HOEVEELHEID: 1 groot oondpan.

BRON: Annelien Pienaar, 2001.




ROMERIGE AARTAPPEL EN PREI SOP

Hierdie heerlike sop kan met oorskiet kapok aartappels gemaak word.
Dit neem letterlik  minute as jy hierdie sop met die klaar gemaakte kappok aartappels maak.
Ek geniet dit om Panini te maak saam met hierdie ryk sop, die gaatjies in die panini se tekstuur slurp die sop op en ag, dit is net heerlik!


RESEP
1 medium ui - grof gekap
1 knoffel toontjie - fyn gedruk
15 ml olyfolie
2 seldery stokkies
3 preie (leeks)
5 medium aartappels - geskil
1 knippie neut muskaat
15 ml gedroogde origanum
2 liter water
1 blokkie groente aftreksel
sout en peper na smaak

METODE
1. Soteer ui en knoffel in olyfolie tot deurskynend.

2. Voeg die res van die bestanddele behalwe die water by en braai vir nog 'n minuut.

3. Voeg water by en prut vir 30 minute of totdat die aartappel sag is.

4. Verpulp die sop en voeg 250 ml room by.

5. Bedien warm of koud.

VARIASIE
1. Ek sit Bloukaas of Brie in my sop vir ekstra smaak, so ¼ wiggie is genoeg, te veel en die sop smaak seperig.

2. Fyn gekapte spek kan in die plek van crutons gebruik word.

3. Garneer met fyngekapte spriet uie en skyfies parmasaan kaas.

4. Suikermielies ingevou is ook heerlik.

5. Bedien met panini!!!

BRON: Annelien Pienaar.

Maandag, 11 Mei 2015

AARTAPPEL PAKKIES

Dit gebeur gereeld dat mens oorskiet kapok aartappels na ‘n aandete het.
Deesdae vind ek myself aspris meer kapok aartappels maak as wat nodig is, ’n verskoning om môre oggend te eksperimenteer!
Ek weet vir die diabete kan julle met New Baby aartappels julle eie kapok aartappels maak, juis omdat die GI van hierdie aartappels laag is en ook verder verlaag as dit dan afgekoel word.
Dus maak ek vir my diabete die kapok aartappel klaar met bietjie laevet margarien, sout en peper na smaak, dan doen ek die aartappel pakkies.


RESEP
2  eiers
⅓ kop suur room of karringmelk of gewone yoghurt
1 kop gerasperde cheddar kaas -opsioneel -
50 ml parmesaan kaas vir diabete
100 ml parmesaan kaas of enige skerp kaas soos Brie of Cammenbert - kan uitgelaat word, dit is net vir smaak
3 kop kapok aartappels - reeds fyn gemaak
¼ kop spriet uie
¼ kop spek - opsioneel vir diabete
sout en peper na smaak

METODE
1. Voorverhit die oond na 180 ˚C.

2. Smeer kolwyntjie pannetjies, ek het vierkantige cupcake wrappers gebruik vir die doel.

3. Klop die eiers en suurroom saam.

4. Meng die eiermengsel met kaas en spriet uie.

5. Proe die fyn aartappel vir sout en pas dit aan voordat dit by die mengsel gevoeg word.

6. Meng al die bestanddele saam en skep in voorbereide pannetjies.

7. Bak 25 - 35 minute totdat dit weg trek van die kante van die pannetjies.

8. Laat 3 minute afkoel in die pan voordat dit bedien word.
Bedien met suurroom of knoffel sousie.
Sien resepte vir knoffel sousie.

BRON:  Annelien Pienaar, 2012.

Sondag, 10 Mei 2015

CASSATA MET 'N TWIST

Ek het jare gelede by ‘n vriendin, Magteld Arnold se verjaardag die idee gekry om te kroek vir 'n asemrowende nagereg.
Dit neem net 10 minute om te maak en jy vergeet daarvan totdat jy dit môre nodig kry.

LES
1. Koop 2 liter vanielje roomys en laat dit vir so 10 minute by kamertemperatuur staan.
Neem 'n broodpannetjie en voer dit met kleefplastiek uit, dit moet oor die kante van die pannetjie gaan sodat dit later oor die roomys gevou kan word en dit help ook met die uitlig van die roomys na die tyd.
Hou dan die pannetjie in die vrieskas totdat dit tyd is om dit te vul met die roomys.

2. Sodra die kante van die roomys begin sag word, sny dit met 'n mes in skywe.

3. Plaas die roomys in 'n mengbak en klits dit met 'n elektriese klitser sodat dit begin sag word, amper soos margarien met 'n smeerbare konsistensie.

4. Nou begin die lekkerrrrrr gedeelte,  jy kan nou jou keuse van neute, kersies, vrugte, nougat, fudge of sjokolade splinters bysit, hoe meer jy by gooi hoe lekkerder...

5. Smeer die roomys so 4 cm dik op die boom van die pan.
Skep klonte gekookte kondensmelk hier en daar en smeer weer roomys, hou so aan tot al die roomys klaar is.

6. Sit onmiddellik terug in vrieskas en laat oornag styf word.

7. Net voor opdiening versier jy dit met bessies en eetbare blommetjies van jou keuse.
Jy kan ook sjokolade dip sous of karamel sous opsit.

8. Julle sal op die foto sien dat die kante van die roomys nog die kleefplastiek se vou merke het, dit lyk vir my mooi.

Ek het al honderde variasies van hierdie resep gedoen, eksprimenteer, dit het nog nooit geflop nie, werk net baie vinnig sodra die roomys smeerbaar is.

BRON: Annelien Pienaar, 2009.

Vrydag, 08 Mei 2015

BAR-ONE EN COCO POP BLOKKIES

Hierdie resep het 'n oulike storie. Die storie begin by 'n klein rooikop knapie (my middel kind) in Graad 3, wat gedink het sy juffrou is die mooiste mens ooit! Eendag moes die kinders vir 'n LO projek elkeen 'n bestanddeel saam neem om hierdie koekies te bak.

Wel, Hardus was so beindruk met die juffrou dat hy in sy eie handskrif die reseppie neer geskribbel het soos hulle gewerk het. Die middag na skool moes ons dadelik al die bestanddele gaan koop om dit ook self te maak. Ek besluit toe, laat ek gou die juffrou kontak en hoor of die resep reg is. Ek lees dit vir haar voor en sy begin net te lag, "ek dog Hardus sit en droom en wil nie help nie!" Wel hier is die foto van sy reseppie en dit is regtig heerlik!


RESEP
125 g botter - Rama of Stork Bake
1 tl vanielje geursel
4 kop coco pops
½ kop kakao
2 kop versiersuiker

METODE
1. Smelt die botter en voeg die vanielje geursel by.

2. Voeg die coco pops, kakao en versiersuiker by en roer deeglik.

3. Skep in gesmeerde oond pan en druk met ‘n ander oondpan bo op plat deur 'n liter water as gewig bo op te sit.

4. Laat stol.

BO LAAG
4 x 55 g Bar-one’s
60 ml of 4 el botter


METODE 
1. Smelt die bar-one en botter saam.

2. Smeer bo oor die gestolde coco pops en laat afkoel.

3. Sny in blokkies of druk vormpies.

4. As jy vormpies druk kan die res weer warm gemaak word en truffels gerol word.
Rol die truffels dan in klapper / kakao / versiersuiker / neute of enige sprinkles.
Geniet.

Bron: Sandel Otto, Broedies, 2010

Woensdag, 06 Mei 2015

CIABATA VS PANINI VIR RADIO PRETORIA LUISTERAARS!


Perfekte rysgate!
WAT IS DIE VERSKIL TUSSEN CIABATA EN PANINI?
Geen, die verskil kom by die grootte!

Ciabata deeg word opgedeel in baie kleiner 100 g pantoffeltjies en dan gebak, die baktyd is ook korter vir die Panino’s (ja, Panino is die meervoud vir Panini).
Dus is die kleiner hand grootte pantoffelbroodjie ‘n Panini!

Gaan loer by Brood - Ciabatta of sommer pantoffel brood vir jou eie reseppie!


KONTAK DETAILS VIR KURSUSSE
Annelien Pienaar 0795956198 of info@bosenbergguestfarm.co.za

STELLENBOSCH UNIVERSITEIT
27 - 28 Mei 2015
Leon van der Westhuizen: leon@alivingway.com

HARTBEESPOORTDAM KURSUS
Heel jaar, sien www.bosenbergguestfarm.co.za vir aktiwiteite.

Panini in draadmandjie en Ciabata lang brode regs onder...

Sondag, 03 Mei 2015

VYE KONFYT

Hier is die beloofde vye resep.
Dit is 'n lang ene maar ek het moeite gedoen met onderliggende kennis opbou, lees deeglik asb.
Basiese beginsels by konfyt kook.

LES
1. Die eerste en belangrikste beginsel van enige inmaak proses (preservering) is 'n steriele omgewing, toerusting en praktyke.
Maak seker dat jou kastrolle, toerusting, werksoppervlaktes, kapplanke, messe, vadoeke en bottels gestriliseer is voordat jy begin.

 2. Dit is belangrik dat die water en suiker saam baie stadig verhit word en die heeltyd geroer word, sodat al die suiker kristalle oplos, die mengsel MAG NIE kook voordat al die suiker opgelos het nie, die kante van die kastrol moet die heeltyd met 'n kwassie en skoon water afgewas word om kristal vorming tee te werk.

 3. Wanneer konfyt gekook word, is dit belangrik dat jy die volgende beginsel onder die knie kry, hoeveelheid suiker, vrug en vog tot die kooksel.
Ek kook konfyt uit my kop uit, nie omdat ek dink ek is slim nie maar omdat ek my verhoudings ken.
Dus: 1 deel vrug tot 1 deel suiker.

4. Jy moet altyd 'n suur by die konfyt voeg om kristal vorming tee te werk.
Met amper 25 jaar se kook ervaring kan ek, na al my eksperimente (flops, baie van) vir julle aandui dat jy nie sonder 'n suur kan werk nie.
Meeste resepte verwys na suurlemoensap, ek verkies om vars te gebruik, die botteltjies is verdun,
ek het dit al met 'n pH meter getoets!
Wanneer mens 'n suur byvoeg doen ek dit die laaste 15 minute voordat die produk gebottelleer word.
Ek vind dat die suur dan nie sy werking later van tyd verloor nie, dit kook uit as jy dit in die begin bysit.
Die ander funksie van die suur is om te help met die pektien om 'n meer jellierige tekstuur te gee.

5. Geurmiddels saam met konfyt verbeter en versterk die vrug se smaak.
Ek is baie lief om 'n duim grootte knoppie gemmer by my vye kooksel te voeg.
Hoe langer die vye in die bottel staan hoe intenser word die geur, amper so 'n liquirish smaak.
Kaneel stokkies, ster anys, casja bas, pynappel en appel kan ook bygevoeg word.

6. Ek gebruik hier net pas ryp vrugte vir die vye halwes en effens papper vir fyn vye konfyt, geen van my vye word geskil nie, onthou die vye se sap brand erger as rissies, handskoene word aanbeveel as jou vel baie sensitief is.

7. Ek smeer altyd my kastrolle se bodems met olie om veral by fyn vye aanbrand te voorkom.

8. Ek vries ook my vye as ek baie het met die suiker oor.
Dan soos ek tyd kry kook ek die vye.
Laat die vye ontdooi by kamertemperatuur en verhit baie stadig totdat al die suiker opgelos het.

9. Die steriliseer van die bottels is die sukses verhaal van die eindproduk en as dit behoorlik gedoen is kan jou vye tot 24 maande op die rak goed bly.
Was met warm seep water die bottels binne en buite asook die deksels, moenie dink as jy bottels in groot maat koop dat dit skoon is nie, dit is nie so nie, die bottels se proppe word deur mense op gedraai, ek was by Consol en het gesien hoe dit gedoen word.
Sit die nat bottels in jou oond op
100 ˚ C om dit droog te maak en warm te hou, asook dit te steriliseer.
As jy lui is soos ek, skottelgoed wasser toe en dan oond toe.

10. Jou toerusting lysie gaan soos volg lyk.
5 - 10 liter kastrol
soplepel
bakke met skoon water vir afskep van skuim en afwas van kante van kastrol
vleis tangetjie om die warm bottels uit die oond te haal
piering vir die bottels om in te staan as jy hulle volskep
droë lappe vir die vashou en toe draai van flessies
Warm flesse bevorder ook 'n goeie vakuum seel tydens bottellering.

11. Moenie die warm bottels met 'n nat lap probeer afvee nie want dit gaan bars, moet dit ook nie in water dompel nie, dit gaan bars.
Draai die bottel op sy deksel en laat so afkoel.
Plaas dit dan na die tyd in koue diep water om die taai te verwyder, koue water werk beter as warm.
Die rede vir op die kop draai,  daar vorm waterdamp in die binnekant van die bottel.
Sodra jy die bottel terug draai los daardie vog van onderaf op en deur osmose beweeg dit na bo om die suiker konsentrasie eweredig te versprei, dus kan daar nie goggas groei nie.
Het jy al gekry dat jy jou konfyt oop maak en daar is 'n skimmel velletjie op?
Wel omdat dit nie omgedraai is nie het die water damp net daar bly lê en die suiker is mos nou verdun en die bakteriee kan lekker begin groei.
Ek weet ook dat die konsep bydra tot 'n digte seel.

RESEP VIR VYE STUK KONFYT
1 kg vye halwes - slegte plekkies uitgesny en afgespoel
800 - 1000 g wit suiker
1 kop water
2 el vars suurlemoensap
1 toontjie gemmer - afgeskil en in baie dun skywe gesny (so groot soos jy duim se kop)
knippie sout


METODE
1. Op lae hitte los al die suiker in die water op, roer gereeld en was die kante van die kastrol met kwassie en skoon water af.

2. Sodra al die suiker deeglik opgelos is kook die stroop vir 5 minute.

3. Voeg gemmer by die kokende stroop.

4. Voeg die vye halwes in 4 bondels by, dus voeg die eerste hopie by die kokende stroop, roer deur en wag dat die mengsel weer begin kook en voeg die volgende by, hou so aan totdat alles bygevoeg is.
Dit is baie belangrik om die stroop se temperatuur konstant te hou anders gaan die vye nie mooi deurskynend kook nie.

5. Terwyl die vye kook sal jy merk dat daar skuim vorm, dit is onsuiwerhede wat skimmels en giste bevat wat moet afgeskep word, die soplepel werk lekker vir die takie.
Roer net af en toe die konfyt terwyl dit matig vinnig kook.
Hoe langer jy kook hoe donkerder kom die vye uit.
Ek hou van 'n ligte vy met 'n matige stropie.

6. Die tyd wat die vye kook word bepaal deur die hoeveelheid wat jy op 'n slag kook, ek kook nooit tuis meer as 3 kg op 'n slag  nie.
So ek doen die somme as volg, jy sal dadelik sien as die vye stroop begin dik word, dit gaan nie meer net in die middel borrel en uitwaarts gaan nie, dit gaan soos stroop oral oor borrel, lyk amper soos 'n aero se borrels oor die hele oppervlakte van die konfyt, dit gaan lyk of dit soos melk wil oorkook.
Voeg dadelik die suurlemoensap en knippie sout by.
Laat dan vir 5 minute so kook en verwyder van die hitte, laat 10 minute staan voordat jy dit warm begin bottel.

7. Soms bly daar stroop oor wat jy kan stoor vir die volgende kooksel of ek kook dit verder om 'n dik stroop vir nageregte te gebruik.

Lewer ongeveer 4 - 5, 475 ml botteltjies.

BRON: Hantie Bezuidenhout (my liefste Moeder).






Saterdag, 02 Mei 2015

BEGK'S SMOKED FOODS


Stalletjie nommer 3 by die onlangse Kaasfees te Sandringham, Stellenbosch is BEGK’s Smoked Foods.
Hierdie man is van Hongarye.
Ek het eers gedink die man se stalletjie is maar kaal, niks wat die oog vang nie maar gou was ek verras!
Die reuk, manne ek sê vir julle, ek rook self vleis maar die man hy ken van!
As ek die aroma moet verduidelik, dit is soos om in ‘n gebou in te stap en dan ruik jy iemand met die heerlikste parfuum, jou oë soek die persoon wat dit dra en al jou sintue is aan die dans, wel my mond het begin water nog voordat ek kon sien waar die reuk vandaan kom.

Dit was nogal ‘n moeilike gesprek om te volg, hy praat met ‘n ongelooflike moeilike aksent engels.
Hy kom nors voor maar sodra hy sien jy weet watter werk en liefde in die produksie ingaan begin hy lekker babbel.
Hy het by sy pa geleer om vleis te “cold smoke”, en rook sy vleis met perske hout.
Hy ry van plaas tot plaas waar hy die hout opkoop vir sy beroking.
Hy het nou so groot geraak met sy besigheid dat hy nou al in die industriele gebied van Stellenbosch ‘n fabriek het waar Char cuterie vleise berei.
Hierdie man reis agter elke fees reg oor die land aan om sy heerlike vleise en gerookte kase te verkoop.
Hy maak die ongelooflikste gerookte droeë wors.

Julle kan hom volg op FB op Begk’s Smoked Foods om te sien waar hy volgende gaan wees, al sy kontak details is ook op FB.




IJZERVARKEN VEL GAAR TE MAKEN

Als de pennen uitgetrokken zijn, doe kokende water op de vel, krap af.
Als goed schoon is neem stukken van vel, mooi gesneden, leg in pekelwater 1 dag.
Kook in vers water de volgende dag.
Kook stadig tot het zacht is.
Haal uit en laat afdrogen, braad op de rooster.
Gebruik met botersous en schijfjes zuurlemoen.

Uittreksel van Ouma en Oupa se Resepte en Boererate uit Toeka se dae, deur Elaine Bosman, Leonora Brill en Fanny Kuhn.